نہ پابندِ زباں ہم ہیں نہ مجبورِ سخن ہم ہیں - از ڈاکٹر کلیم عاجزؒ Na paband e Zaban Ham hain by Dr. Kaleem Aajiz R.A

بہ ایں قیدِ خموشی بھی غزلخواں ہمہ تن ہم ہیں

نہ پابندِ زباں ہم ہیں نہ مجبورِ سخن ہم ہیں

گلستاں میں شریکِ صحبتِ اہلِ چمن ہم ہیں

بس اتنی بات پر کیوں قابل دارو رسن ہم ہیں

جوابِ ظلم دیتی جارہی ہے اپنی مظلومی

اُدھر تلوار رنگیں ہے اِدھر رنگیں کفن ہم ہیں

خزاں سے کب کی بنیادِ گلستاں گر چکی ہوتی

مگر یہ خیریت ہے زیرِ دیوارِ چمن ہم ہیں

نشیمن پھونک کر سمجھے سب کچھ پھونک ڈالا ہے

حجابِ گل میں بیٹھے بجلیوں پر خندہ زن ہم ہیں

اگرچہ بزم میں ہم بھی ہیں لیکن فرق کتنا ہے

وقارِ انجمن تم ہو ۔ وبالِ انجمن ہم ہیں