رنج خزاں میں شوق بَہارِ چمن میں ہے - از ڈاکٹر کلیم عاجزؒ Ghazal by Dr. Kaleem Aajiz R.A

رنج خزاں میں شوق بَہارِ چمن میں ہے

دیوانہ آج تک اُسی دیوانہ پن میں ہے

کھینچی ہے بیکسی نے یہاں ایک آہ سرد

سہمی ہوئی سی شمع وہاں انجمن میں ہے

آتی ہے صاف صاف جھلک زخم و داغ کی

دل اور بے حجاب نقابِ سخن میں ہے

کچھ آستینِ برق میں ہے خاکِ آشیاں

کچھ دامنِ ہوائے بہارِ چمن میں ہے

ہر ناوکِ ستم یہ بتاتا ہے صاف صاف

اَب زور کتنا بازوئے ناوک فگن میں ہے

جلنے دے جل رہا ہے دلِ بے زباں اگر

تو خوش تو ہے کہ شمع تری انجمن میں ہے

آتی ہے پھر زباں پہ مری گفتگوئے حق

پھر ایک زور عالمِ دارو  رسن میں ہے

عاجزؔ  کرون گا پیش کیا میں اہل بزم کو

بس  اک متاعِ غم مری جیبِ سخن میں ہے